A Facultade de Historia do campus de Ourense foi o lugar elixido para a celebración este xoves e venres das II Xornadas de Investigación en Patrimonio Cultural. A actividade estivo organizada no marco do Programa Interuniversitario de Doutoramento en Protección do Patrimonio Cultural, ofrecido polas universidades de Vigo, Santiago de Compostela e A Coruña.
As xornadas presentáronse como un espazo de encontro e intercambio científico entre o alumnado e o profesorado do programa, e contou coa participación de estudantado seu e de persoas egresadas que compartiron a súa experiencia investigadora e profesional. En total contou con 15 conferencias doutros tantos novos e novas investigadoras e unha mesa redonda de egresados e egresadas. O evento foi semipresencial, podendo seguirse de xeito presencial ou a través do Campus Remoto da UVigo. “As primeiras xornadas fixéranse en Trasalba antes da pandemia e este ano decidimos retomalas para ofrecerlle aos nosos doutorandos un punto de encontro, un espazo no que compartir procesos de investigación e xerar redes de traballo e apoio entre eles”, explicou a profesora da UVigo Beatriz Comendador, coordinadora deste programa de doutoramento.
Este mércores arrancou na Facultade de Historia do campus de Ourense a terceira edición do curso Ourense no Tempo: Historia, Arte e Tradicións. Nel faise divulgación científica das investigacións que leva a cabo a comunidade universitaria do Departamento de Historia, Arte e Xeografía da Universidade de Vigo en temáticas relacionada coa provincia de Ourense así como as de outro persoal investigador externo especializado.
Cunha duración de 35 horas, a iniciativa forma parte da programación de cursos de extensión universitaria, os chamados cursos de verán, que ofrece neste 2025 a Vicerreitoría do campus de Ourense co apoio da Deputación de Ourense. O seu director é o historiador e profesor José Ramón Campos, que destacou na inauguración do evento este mércores xunto a Julio Prada, decano da Facultade de Historia, que este curso celebra a súa terceira edición grazas á boa acollida que ten cada ano, cunha media de 40 persoas matriculadas e unha boa avaliación por parte das e dos asistentes.
O pasado 30 de maio de 2025, no marco dunha estadía académica na Facultade de Arquitectura da Universidad Autónoma del Estado de Morelos (UAEM), tivo lugar a sinatura dunha Declaración de Intencións para a colaboración entre corpos académicos, coa participación da Universidade de Vigo.
Esta declaración constitúe un paso significativo cara á transferencia de coñecementos en arquitectura, arqueoloxía, turismo e patrimonio cultural, e abre novas vías de cooperación entre a UVigo e a UAEM, especialmente a través do Cuerpo Académico “Gestión del Patrimonio Turístico y Cultural”.
A representación da UVigo contou coa participación dunha investigadora do Programa Interuniversitario de Doutoramento en Protección do Patrimonio (UVigo, UDC, USC), quen expresou o seu máis sinceiro agradecemento á Dra. Norma Angélica Juárez Salomo, pola súa xenerosa acollida e compromiso, así como ao equipo que acompañou este encontro: Mariana Sylveira Rosales, Miguel Ángel Cuevas Olascoaga, Gerardo Gama Hernández, Concepción Alvarado Rosas e Ernesto Ríos Lanz.
A iniciativa conxunta nace co espírito de:Promover proxectos COIL (Collaborative Online International Learning) coa Facultade de Historia do campus de Ourense, Desenvolver clases espello arredor do patrimonio, a paisaxe e o territorio, Traballar en publicacións compartidas, Organizar encontros académicos e actividades de intercambio e Explorar programas como ERASMUS e fortalecer as redes internacionais.
Desde a Universidade de Vigo, e en nome do Programa de Doutoramento e do Grupo de Innovación Docente en EducAcción Patrimonial (UVigo), queremos agradecer profundamente esta oportunidade de diálogo, aprendizaxe e cooperación internacional.
O noso recoñecemento tamén á Facultad de Arquitectura da UAEM, ao seu Programa de Doutoramento en Arquitectura e Urbanismo, e a todas as persoas que fixeron posible esta enriquecedora experiencia.
Seguimos construíndo pontes a través do patrimonio compartido.
#UVigo #UAEM
#Galicia #México
#ColaboraciónAcadémica #PatrimonioCultural #COIL #IntercambioInternacional
#Erasmus #Arqueoloxía #Arquitectura #Turismo #EducaciónPatrimonial
A Rede Española de Ciencia e Tecnoloxía para a Conservación do Patrimonio Cultural (TechnoHeritage) celebrará a vindeira semana en Santiago de Compostela o seu congreso internacional, logo dunha primeira edición celebrada xa na capital galega en 2012. Nesta ocasión, o 5º Congreso Internacional TechnoHeritage2024 desenvólvese conxuntamente ao 1º Encontro Bienal do Grupo Especializado de Química para o Estudo e Conservación do Patrimonio Cultural (GEQP) da Real Sociedade Española de Química (RSEQ).
Organizado polas tres universidades galegas, terá lugar do 25 ao 27 de setembro no paraninfo da Universidade de Santiago de Compostela, na Facultade de Xeografía e Historia, un escenario perfecto para o intercambio de coñecementos e ideas en ciencia, con especial relevancia da química e tecnoloxía, para a Conservación do Patrimonio, servindo de inspiración e marco para o debate e a discusión sobre Ciencia e Arte.